زامان دئییشیر هر آن!
اینسانلیق قوپ- قورو
یومورتا قابیغی تک
ال دئییرسن سینیر
جانامازلار دای نامازا آچیلمیرلار
داها ییخیلمیشلار قالدیریلمیرلار
قلملر گئرچه یی اونودوبلار
قان قوسوبلار.
نئدن زامان دئییشیر بئله؟!
ترسینه دولاناردی کئشگه
نه اولاردی ...
چیرپینیر الیمده کی اوره ک
یاشاییر ایچیمده کی سئوگی
تیتره ییر اوره ییمده بیر اوره ک
آنجاق
بیری الیمده
بیری ایچیمده
قانیم قانینا به لنیر
ایچیمده کینین
گورمه دن اونو سئویرم
گوزلری جئیران دئییرم
دوداقلاری گونش
ساچلاری ایپک دن یوموشاق
بالاجا اللری توتور بارماقلاریمی
من اونو باغریما باسیرام
آما الیمده کی اوره ک
بیر وولکان پارتلاییشی دیر
یاندیریر اللریمی
یاشاییرام اونون تیپ تیپینان
او دورارسا منده دورارام
چیرپینیرسا یاشایارام
یاشادییرام اونو اوزومده
یاشاییرام اونونلا بیرگه
ترسینه دولانیر دونیا دئیه سن
باشیم گیجه للنیر
اللریم توتا بیلمیر توتاجاقلاری
دیلیم دئیه بیلمیر دئیه جکلری
آنیردیم چیچکلندیره جه یم اوره یینی
بیر دسته چیچکله
آما ایندی
اللریم ترله ییر
باشیم قیزیشیر
خزان اولموش اوره ییمین یارپاقلارینی
دسته باغلاییب
واریم بو دئیه
سنه وئردیم.
گولوم دئیه آلدین الیمدن
چیچکلنه جک اوره ییمیز
چیچکلنه جک دئدین.